قالت تعرف الحب ولا انت كذاب
قلت انشدي قلبن تزايد عذابه
ادري وش علومه وهو مثل الاطناب
اللي تشد البيت وقت الهبابه
به حب يبقى شاب لوصاحبه شاب
وحبن يشيب وصاحبه في شبابه
وحبن يغيب وصاحبه مابعد غاب
وحبن يدوم وصاحبه في غيابه
وحبن يذوّب خافقن مابعد ذاب
وحبن يداوي صاحبه من عذابه
وحبن يتوّب خافقن مابعد تاب
وحبن يزيدك رغبتن في الكتابه
وحبن حياته كلها لوم وعتاب
وحبن حقيقي مايضرك عتابه
وحبن بلا معنى وحبن بلا اسباب
يبدى غريب وينتهي في غرابه
وحبن ضعيفن مثل حبرن على كتاب
تمحيه دمعات الحزن والكآبه
وحبن قويّن مثل قصرن له ابواب
لو هب عاتي الريح مااهتز بابه
وحبن بداية رحلته نظرة اعجاب
وآخر مطافه مثل يومن بدا به
وحبن خفيًّ داخل قلوب الاحباب
وحبن يشيع وكل حيًّ درابه
وحبن مقامه في حنايا الصدر طاب
وحبن يعدّي مثل مشي السحابه
وحبن على قبره نعق بوم وغراب
وحبن مثل لحنن تجرّه ربابه
وحبن بمقدارن وحبن بلا حساب
وحبن عطيّة خير وحبن نهابه
وحبن غدا سرّه سوالف للاجناب
وحبن توفى صاحبه ماحكى به
وحبي جمع من كل ماقلت وماتاب
ولانيب كذابن وقلبي شقا به
وسلامتكم